Paindikan sane Ngangobin 3: Kuasan Hyang Yesus kapinin Tentara Romawi sane Pracaya
(Lukas 7:1-10)
Pengayah Prawira sane Sungkan
3
Sasampune Hyang Yesus wusan ngajahin anake akeh,
raris Ida mamargi ka Kota Kapernaum.
2 Irika wenten prawira Romawia madue pengayah sane kasayangang.
Pengayahe punika sedek sungkan das padem.
3 Ritatkala punika,
prawira Romawine mirengin indik Hyang Yesus.
Punika mawinan ipun ngutus para penglingsir Yahudine tangkil ring Hyang Yesus nunas mangdane Ida nyegerin pengayah ipune.
4 Sasampune kacunduk sareng Hyang Yesus,
para penglingsir Yahudine punika nunas tulung ping banget sapuniki,
“Prawirane punika pantes tulungin Iratu.
5 Krana ipun nresnain bangsan iragane tur ngwangun bale wantilan agaman iragane.”
6 Raris Hyang Yesus lunga sareng ipun sami.
Ritatkala ipun sami sampun nampek ring jeron pemimpin tentarane,
irika pemimpine ngutus timpal-timpalnyane ring Hyang Yesus mangda mabesen sapuniki,
“Sampunang ja Iratu repot ka umah titiange.
Sawireh titiang nenten pantes nerima Iratu ring umah titiange.
7 Punika mawinan titiang kimud tangkil ring Iratu.
Nanging baosang ja prentah abuku;
pastika pengayah titiange kenak.
8 Krana titiang tinut ring prentah anak sane mapangkat tegehan,
lan wenten pada anak pangkatnyane betenan kapining titiang.
Yening titiang nunden salah tunggal ipun,
‘Kemu ja,’
pastika ipun jagi luas kemu.
Taler kapining sane lianan,
yening titiang nunden,
‘Mai ja,’
pastika ipun jagi rauh nekain titiang.
Yening titiang mrentahang ring pengayah titiange,
‘Laksanayang ja ene,’
ipun jagi nglaksanayang.”
9 Sasampune Hyang Yesus mirengin pabesen anake punika,
Ida angob.
Raris Ida nyingakin anake akeh sane nyarengin Ida tur ngandika,
“Tiang negesin kapining ragane makasami:
Tiang angob pisan nyingakin anak Romawine punika madue kapracayaan ageng,
agengan kapining anak saking bangsan Tiange.”
10 Irika raris anake sane kanikain punika budal ka jeron prawirane,
kapanggihin pengayahe irika sampun kenak.